30 қаңтар күні, Almaty Theatre сахнасында Роза Бағланова атындағы «Қазақконцерт» мемлекеттік академиялық концерттік ұйымына қарасты «Birlik» би ансамблінің концерті өтеді, деп хабарлайды BAQ.KZ.
Іс-шара 2025 жылғы еліміздегі маңызды оқиғалардың бірі - Қазақстан халқы Ассамблеясының 30 жылдығымен қатар ұйымдастырылады.
Бұл концерттің мақсаты – көрерменді түрлі этностардың би, ән және музыкалық шығармаларынан тұратын Қазақстанның бай ұлттық өнерімен таныстыру.
Концерттік бағдарламада әртүрлі халықтардың мәдениетін біріктіретін ғажайып хореографиялық қойылымдар, жанды музыка және Қазақстан, Ресей, Өзбекстан мен Татарстаннан келген танымал хореографтардың қойылымдары ұсынылады.
Айта кетейік, аталмыш ансамбль ҚР Мәдениет және ақпарат министрлігінің қолдауымен 2024 жылғы 1 наурызда Роза Бағланова атындағы «Қазақконцерт» мемлекеттік академиялық концерттік ұйымының жанынан құрылды.
