Нұр-Сұлтан, BAQ.KZ. 7 наурызда кешке Алматы облысы Қарасай ауданындағы Шамалған ауылының маңында екі топ адам төбелесіп, оған 30-ға жуық адам қатысқан. Олардың оқ тиген бірі ауруханаға жатқызылған.
Бұл туралы облыстың ПД хабарлады.
Оқиға болған жерді тексеру кезінде криминалистер мылтық, тегіс ұңғылы және травматикалық қарудан атылған көптеген оқ-дәрі тапты. Әлеуметтік желілер мен БАҚ-та қоғамдық резонанс тудырған атыс фактісі бойынша қылмыстық заңнаманың бірнеше баптары бойынша қылмыстық іс қозғалды. Тергеу облыстық полиция департаментінің ерекше бақылауына алынды, - делінген хабарламада.
Мемлекетаралық іздеудегі үш адамның осы төбелеске қатысқаны анықталды.
Күдіктілерге ҚР Қылмыстық кодексінің 293-бабы, "Атыс қаруын қолдана отырып, бұзақылық жасау", 380-баптың 1-тармағы, "Құқық қорғау органы қызметкерінің өміріне қауіп төндіру", 24-99-баптар, "Адам өлтіруге оқталу" бойынша айып тағылды.
Төбелеске қатысушылардан түрлі калибрлі 12 атыс қаруы тәркіленіп, олар заттай дәлел ретінде қылмыстық істер материалдарына қоса тіркелді. Сондай-ақ сегіз автокөлік (Lexus, ВАЗ, Mercedes-Benz, Toyota және т.б.) тәркіленді, олар қажетті сараптамалар жүргізу үшін арнайы тұраққа қойылды.
Қылмыстық тергеу шеңберінде полиция қызметкерлері аталған оқиғаға қатысушы өзге күдіктілерді анықтау және іздеу бойынша іс-шараларды жүзеге асыруда.
