Желіде Есік көліне демалуға барған демалушылар шағымданған видеолар пайда болды. Онда азаматтардан жекеменшік деген желеумен ақша алынғаны айтылған, деп хабарлайды Алматыдағы BAQ.KZ тілшісі.
Демалушылардан Іле-Алатауы мемлекеттік ұлттық паркіне кіреберісте экологиялық бекеттен ресми төлем алынса, 10 шақырым өткеннен кейін жекеменшік деген желеумен тағы да адам басына 2 мың, жеңіл көліктерге 2,5 мың, мироавтобустар 5 мың, үлкен автобустар 20 мың теңге алынған.
Облыс әкімдігінің мәліметінше, "Хабель" ЖШС-мен жасалған сенімгерлік басқару шартына сәйкес туристерден төлемақы алу қарастырылмаған.
Басқарушының мұндай әрекеттері оның өкілеттігінен тыс әрі шарт талаптарын бұзады. Көліктерден алынатын төлемақы тек Іле-Алатау ұлттық паркі аумағында заңнамаға сәйкес белгіленген. "Хабель" ЖШС-на заңсыз төлемақыны тоқтату және орнатылған шлагбаумдарды алып тастау туралы хабарлама жолданды, – деді Алматы облысы әкімдігінен.
Әкімдік 17 тамыздан бастап Есік көліне кіреберістегі шлагбаумдар алынғанын атап өтті.
