Нұр-Сұлтан, BAQ.KZ. Талдықорған қаласында 55 күнде салынған 200 орындық заманауи модульді инфекциялық аурухана ашылды, – деп хабарлайды Алматы облысы әкімінің баспасөз қызметі.
Нысанның ашылуында облыс әкімі Амандық Баталов мердігерге құрылыс жұмыстарын сапалы жүргізгені үшін алғыс білдіріп, басты міндет халықтың денсаулығын сақтау екенін атап өтті.
Елбасы мен Президент тапсырмасына сәйкес, бүгін Талдықорғанда біз модульдік инфекциялық аурухананы пайдалануға беріп жатырмыз. Осы мүмкіндікті пайдаланып, үш ауысымда жұмыс істейтін жұмысшылар 55 күнде сапаны жоғалтпай, ең маңызды нысанды салып, пайдалануға бере алған мердігерге шын жүректен ризашылығымды білдіремін. Заманауи жабдықтар орнатылған ауруханада науқастардың сауығып кетуіне және өмірлерін сақтау үшін қажетті заманауи құрылғылар орнатылды. Біз бірлескен күш-жігермен қауіпті инфекцияны жеңетінімізге және пандемияны бірге жеңетінімізге сенімдімін. Бұл үшін мемлекет барлық жағдайды жасайды. Биылдың өзінде облыста денсаулық сақтау нысандарының құрылысына 12 миллиард, коронавирустық инфекцияның мүмкін екінші толқынына дайындыққа 7,3 миллиард теңге бөлінді. Тұрақты негізде біз облыстың медициналық қызметкерлеріне барлық қажетті қолдауды көрсетеміз, жәрдемақы төлейміз. Келесі жылы облыс орталығында дәрігерлер үшін арнайы 60 пәтерлік тұрғын үй салынады. Коттедж қалашығында медициналық қызметкерлерге шамамен 47 үй бөлу мәселесін де пысықтап жатырмыз, – деп сөзін түйіндеді А. Баталов.
Сондай-ақ облыстың медицина қызметкерлеріне, әсіресе коронавирустық инфекциямен күрес кезінде, олардың тынымсыз еңбегі мен қажырлығы үшін алғысын білдірді.
Жоба директоры, мердігерлік ұйымның өкілі Арман Қабұлқас жаңа жұқпалы аурулар ауруханасының жұмысы мен орналасу ерекшеліктері туралы айтты.
Заманауи талаптарға сәйкес жаңа жұқпалы аурулар ауруханасында процестердің көпшілігі автоматтандырылған және цифрландырылғанын атап өткен жөн. Онда жұмыс істейтін медицина қызметкерлерінің өздері инфекцияны жұқтырмауын және инфекцияны одан әрі таратпауын қамтамасыз етуге басты назар аударылады. Ол үшін аурухана «таза» және «лас» аймақтарға бөлінеді. Медицина қызметкері таңертең жұмысқа келіп, «таза» аймаққа кіреді. Киім ауыстырғаннан кейін, жеке қорғаныс құралдарын алғаннан кейін ол «лас» аймаққа жұмысқа шығады. Сонымен қатар, ауысым аяқталғаннан кейін медициналық қызметкер барлық сақтық шараларын қолданып, жеке қорғану құралдарын шешіп, жуыну бөлмесіне кіреді, осыдан кейін киімін ауыстырып, ауруханадан басқа есіктер арқылы шығады. Екінші ерекшелігі – барлық палаталарға орнатылған желдету жүйесі, соның арқасында оларда жинақталған ауа дәліздерге есіктер ашылмай, ультрафиолет сәулелерімен тазартылғаннан кейін дренаж жүйесі арқылы қысыммен кетеді. Бұл ауаны тазарту жүйесі барлық палаталарда, жан сақтау бөлімінде және зертханаларда орнатылған. Сонымен қатар, аурухананың барлық қызметкерлері бірыңғай ақпараттық жүйеге қосылған планшеттермен қамтамасыз етілген. Осының арқасында әр дәрігер, әр медбике әр пациент туралы ақпаратты үнемі қарап, қадағалап, жаңарта алады. Сонымен қатар, кеңес барысында әріптестерімен де науқастар жайлы ақпаратпен бөлісе алады. Жан сақтау бөліміндегі әр кереуеттің үстінде бейнекамералар орнатылып, бір жүйеге қосылған. Бұл кезекші операторға тәулік бойы әр науқасты монитордан көруге және оның жағдайының сәл өзгеруін бақылауға мүмкіндік береді.
Жалпы, жаңа облыстық жұқпалы аурулар ауруханасы ауыр жұқпалы аурулармен ауыратын науқастарды емдеуге арналған. Ал оны аурухана ретінде пайдалануға болады. Жан сақтау бөлімі бар. Жобаның жалпы құны 7,5 миллиард теңгені құрайды. Ауруханада 200 жатын орын бар. Жоба аясында медициналық жабдықтар, жиһаздар орнатылып, іргелес аумақ абаттандырылды. Ғимараттың ауданы 6,8 мың шаршы метрді құрайды. 55 күн ішінде құрылыс жұмыстарын «BI-Industrial» ЖШС мердігер ұйымы жүргізді.
Жаңа аурухананың заманауи медициналық жабдықтармен, оның ішінде диагностикалық және зертханалық жабдықтармен жабдықталғанын ерекше атап өту маңызды. Компьютерлік томограф, сандық рентген, жылжымалы рентген аппараты, 20 өкпені жасанды желдету аппараты, виброкаустикалық, гемодиализ аппараты, биохимиялық, клиникалық, экспресс-зертханаларға арналған жабдықтар мен басқа да барлық қажетті медициналық құрал-жабдықтармен толықтай қамтамасыз етілген.
