2025 жылдың соңына дейін өңірлерге берілетін қосымша салықтар мен төлемдердің көлемі 2 есе ұлғаяды. Мұндай деректер Ашық НҚА порталында жарияланған «Қазақстанда жергілікті өзін-өзі басқаруды дамытудың 2025 жылға дейінгі тұжырымдамасында» келтірілген, деп хабарлайды BAQ.KZ.
Құжатта көрсетілгендей, Жергілікті өзін өзін басқаруды дамыту тұжырымдамасын орындау аясында мына жұмыстар қолға алынады:
- мәслихаттың тексеру комиссиялары мүшелерін төрағаның ұсынуы мен Жоғары аудиторлық палатаның келісімі арқылы тағайындауды енгізу;
- барлық деңгейдегі мәслихаттар жұмысының тиімділігін арттыру;
- әкімшілік-аумақтық құрылысты жетілдіру;
- 2024 жылдың қаңтар-желтоқсан аралығында әкім аппараттарын жергілікті өзін-өзі басқару әкімшілігі етіп қайта құруға бағытталған пилоттық жобаны іске асыру;
- Қалаларда жергілікті өзін-өзі басқаруды дамыту;
- Азаматтарды жергілікті өзін-өзі басқару ісіне тарту.
Осы жұмыстарды жүйелі жолға қою есебінен мына нәтижелерге қол жеткізу жоспарланып отыр:
- 2024 жылға дейін Қазақстандағы аудандар мен облыстық маңызы бар қала әкімдерінің 25%-ын тікелей сайлау;
- 2025 жылдың соңына қарай бюджеттің IV деңгейіндегі өткізілмеген мемлекеттік сатып алулар көлемін 2023 жылмен салыстырғанда 3 есеге азайту;
- 2025 жылдың қорытындысы бойынша бюджеттің IV деңгейіндегі салықтық және салықтық емес түсімдерді (қосымша салықтар мен төлемдерді беру есебінен) 2021 жылмен салыстырғанда 2 есе арттыру.
«Жоғарыда көрсетілген шараларды іске асыру жергілікті өзін-өзі басқару органдарының қызметін күшейтуге, ауылдық округтер әкімдерінің өкілеттіктерін кеңейтуге, әкімдерді сайлау процесін жетілдіруге мүмкіндік береді», - деп Ұлттық экономика министрлігі тұжырымдамаға түсіндірме берген.
Құжат 26 қыркүйекке дейін көпшілік талқылауда болады.
