Мәжіліс депутаты Елнұр Бейсенбаев АЭС құрылысын жария талқылауда көтерілген негізгі мәселелерді атады, деп хабарлайды BAQ.KZ тілшісі.
АЭС туралы біраз ақпарат айтылды. Жария талқылауда депутат халықтың көтерген үрейін естігенін айтып, оларға тоқталды.
Фукусима мен Чернобыльді айтып жатыр. Бірақ осы екі жағдай болғанымен, жапондар мен ресейліктер АЭС-тен бас тартты ма? Жоқ, бас тартқан жоқ. Екі елде кемінде 30 пайыз энергетикалық тұрақтылықты АЭС-тер сақтап отыр. Кеше ғана Олимпиада өткен Францияда АЭС 70% энергия беріп отыр. Иә, қазір Қазақстанда энергетикалық жетіспеушілік бар, - деп пікір айтты депутат.
Елнұр Бейсенбаев Орталық Азияда алдағы 10 жылда энергетикалық коллапс болуы мүмкін деп санайды. Сөзінше, 10%-ға дейін энергетикалық жетіспеушілік болуы мүмкін.
Көтеріліп отырған мәселелерге ғылыми тұрғыдан қарау керек. Екінші мәселе - экологиялық қауіпсіздік. Мысалы, осыдан 12 жыл бұрын Бейжіңде болдым. Сол кезде демалатын ауа болмайтын. Өнеркәсіптің барлығы көмірмен жұмыс істейтін еді. Қытай алдағы уақытта тағы 150 реактор салуды жоспарлап отыр, - деп түсіндірді ол.
Бейсенбаевтың сөзінше, қазір Бейжің - экологиясы ең таза қалалардың бірі.
Оның ойынша, егер Қазақстанда энергетикалық тұрақтылық қамтамасыз етілмесе, инвесторлар келмейді дейді.
Қазақстанда зауыт салатын болсаңыз, оған белгілі мөлшерде электр энергиясымен қамтамасыз етуіміз керек. Оны қалай қамтамасыз етеміз? Күн, жел электр станциялары арқылы энергия алуға болады. Бірақ ол - тұрақсыз энергия. Семей полигоны сияқты жағдай болуы мүмкін дейді. Онда электр қуатын алу мақсатында емес, қару-жарақ ретінде қарастырылды. Ол екеуін салыстыруға келмейді, - деп айтты Елнұр Бейсенбаев.
Ол өз сөзінде жария талқылауда шынайы пікірталас болғанын қоса кетті.
Бұған дейін хабарлағанымыздай, АЭС салу тақырыбын жария талқылауда Ұлттық ядролық орталықтың директоры Эрлан Батырбеков АЭС құрылысының Балқаш көліне қалай әсер ететінін түсіндірді.