Мәжіліс депутаты Данияр Қасқарауов Премьер-министрге жолдаған сауалында Қарасай ауданының проблемаларын көтерді, деп хабарлайды BAQ.KZ тілшісі.
Данияр Қасқарауов атап өткендей, Президенттің шешімімен елімізде жаңа үш облыс пайда болды. Оның ішінде Алматы облысы екіге бөлінді.
Біздің облыста арнайы Алатау қаласы бой көтерді. Бұл біздің өңір үшін Президент тарапынан едәуір қолдау. Дегенмен әлі де өңіріміздің аудандарындағы инфрақұрылым мәселелері шешімін таппай отыр. Мысалы, шалғайдағы аудандарды айтпағанда, Алматы қаласының іргесінде тұрған Қарасай ауданының проблемалалары шаш етектен. Ал ол мәселелерді шешуге не облыс, не аудан, не ауыл әкімдері құлықты емес. Әрбір мәселеге тек сыдырма жауап қайтарумен шектеліп келеді, - дейді Қасқарауов.
Мысалы, сол жердегі Кемертоған ауылының әлеуметтік мәселесі ушығып тұр. Жарық, жол және суға жарымаған жұрттың төзімі әбден таусылған. Кемертоған ауылында 160-тан астам тоқ қосалқы станция бар екен.
Оның барлығы жекеменшіктің қолында. Жер алып, үй салған халық электр энергиясын қосу үшін 300 мың-500 мың теңге төлеуге мәжбүр. Бірақ техникалық талаптарға сай келмейтін желілер жиі үзіліп, тұрғындардың тұрмыстық техникалары күйіп жарамсыз болып отыр. Келесі мәселе, Кемертоғандағы көшелердің тозығы жеткен, жол мүлдем жоқ деп айтса болады. Кейбір көшелер жекеменшіктің қолында. Мәселен Жасқыран, Шапағат көшелеріндегі тұрғындар өз үйлеріне көше арқылы кіріп шыға алмайды. Себебі көше түсуі тиіс телімдер жекенің қолында. Жергілікті автокөлік жолдары, өндірістік аймақтардың жерлері бөтен біреулердің жер учаскесі болып кеткен, - дейді ол өзінің депутаттық сауалында.
Депутаттың айтуына қарағанда, Қарасай ауданындағы жер мәселесі де ушығып тұр. Өкініштісі, су қорғау белдеулерінің аумағында жаппай құрылыс салынып жатыр, Іле-Алатауы ұлттық саябағының қорғау аймағында, мүрделердің санитарлық қорғау аймағында тұрғын үйлер соғылып жатыр. Рекреациялық аймақтар қысқарған.
Оған қоса, үш ауысымды мектептердің мәселесі әлі күнге дейін шешімін таппай келеді. Әсіресе, Іле, Жамбыл, Еңбекшіқазақ, Қарасай, Талғар аудандары мен Қонаев қаласының өзінде үш ауысымды мектеп мәселесі күйіп тұр. Қазіргі таңда осы аталған аудандарда шамадан тыс жүктемесі басым 82 мектеп бар, - деп айтты мәжілісмен.
Сонымен қатар кейінгі жылдары мәдениеттің ең негізгі өзегі рухани салада түбірлі жаңғырулар жүргізілген жоқ.
Оған дәлел, облыстың 22 ірі ауылында осы күнге дейін мәдениет үйлері мен ауылдық клубтар жоқ, 25 мәдениет үйі мен клубтар апатты жағдайда тұр. Сондай-ақ 25 мәдениет нысан жөндеуді қажет етеді.
Депутат Қасқарауов Қарасай ауданындағы күрмеуі көп мәселені шешу үшін мынадай талап қойды:
Біріншіден, Бас Прокуратурадан - электр жабдықтау ұйымының 2021-2023 жылдардағы шаруашылық қызметін прокурорлық тексеруді;
Екіншіден, Ауыл шаруашылығы министрлігіне аудан бойынша жекеменшікке берілген жерлердің заңдылығын қайта қарауды.
Үшіншіден, Жер кодексіне және басқа да заң актілеріне сәйкестігін және заңдылығын анықтау мақсатында инспекторлық тексерісті ашуды талап етемін.
Төртіншіден, Оқу-ағарту, Мәдениет және ақпарат министрліктеріне аталған өңірдегі үш ауысымды мектептерді жою, сонымен бірге білім, мәдениет және спорт саласындағы жаңа объектілердің құрылысы мен төтенше жағдайдағы объектілердің жөндеу жұмыстары бағытында нақты атқарылып жатқан шаралар туралы ақпаратты заңнамада белгіленген мерзімде беруді сұрады.
