Астанада өткен Қазақстан ауыл әйелдерінің V республикалық форумы аясында ҚР ЕХӘҚМ Көші-қон комитетінің төрағасы Асқарбек Ертаев әйелдерді жұмыспен қамту туралы айтты, деп хабарлайды BAQ.KZ.
Оның айтуынша, осы жылдың төрт айында 111,5 мың әйел жұмыспен қамтуға жәрдемдесудің белсенді шараларымен қамтылған.
Өз сөзінде Асқарбек Ертаев өткен жылдың бірінші тоқсанымен салыстырғанда әйелдер арасында жалпы жұмыспен қамту 86,9 мың адамға, негізінен жалдамалы жұмыскерлер (72,3 мың адам) және өз бетінше жұмыспен қамтылғандар (14,5 мың адам) есебінен өскенін атап өтті.
Экономикалық қызмет түрлері бойынша әйелдердің басым бөлігі білім беру саласында – 876,9 мың адам, көтерме және бөлшек сауда саласында – 853,2 мың адам, денсаулық сақтау саласында – 413,5 мың адам, орман және балық шаруашылығында – 389,7 мың адам жұмыс істейді. Әйелдердің ең аз саны – 34,2 мың адам сумен жабдықтау саласында жұмыс істейді.
2024 жылғы 1 мамырдағы жағдай бойынша 111,5 мың әйел жұмыспен қамтуға жәрдемдесудің белсенді шараларымен қамтылды. Оның ішінде 82,8 мың адам жұмысқа орналастырылды, оның 20,5 мыңы тұрақты жұмыспен қамтылды, – деді Асқарбек Ертаев.
Форум шеңберінде ауылдағы әйелдерді нәтижелі жұмыспен қамтамасыз ету, кәсіпкерлікті дамытудың тиімді жолдарын, оның ішінде ауыл үшін көрсетілетін мемлекеттік қолдау шараларын айқындау мәселелері талқыланды.
